Pahanugutan na ang 100 percent nga seating capacity sa pampubliko nga mga salakyan sa syudad sang Iloilo umpisa sa Oktubre 16 tubtub sa 31.

Kabahin ini sang mga pagpanghalog sa mga pagsulundan sa idalom sang General Community Quarantine (GCQ).

PHOTO: ILOILO CMO

Sa interview sang Bombo Radyo kay Iloilo City Mayor Jerry Treñas, iya ginpahayag nga vaccinated naman ang kalabanan sa mga drivers gani nga mas safe na ang pagbyahe.

Pwede na nga makuha ang mga plastic barriers suno sa alkalde, apang sandig pa sa mangin guidelines sang National Inter-Agency Task Force.

Sa latest EO sang alkalde, nakabutang nga apisar allowed na ang full capacity sa public transportation, highly-encouraged man gihapon nga magpasakay lang tubtub sa 50 porsyento sang kapasidad.

-- Web Ads --

REAKSYON SANG TRANSPORT GROUP

Kun mapatuman na ang full capacity sa pampubliko nga mga salakyan, bawion sang isa ka transport group ang petisyon sini para sa fare increase ukon pagpasaka sang plete.

Sa interview sang Bombo Radyo kay Raymundo “Boyet” Parcon, Presidente sang Iloilo City Loop Alliance of Jeepney Operators (ICLAJODA), iya ginpahayag nga ang bag-o nga EO ang makabig daku nga fiesta para sa sektor sang transportasyon kun maumpisahan na ang implementasyon.

Ginahulat pa subong sang natungdan ang maathag nga guidelines ukon kun pinal na nga kakason ang plastic barriers sa jeepney units.

Facebook Comments

bomboradyo