GENERAL SANTOS CITY – Wala na makasukol pa ang usa ka wanted nga dugay nang nagtago sa otoridad human makorner sa kapulisan sa usa ka lugar sa Labangal ning dakbayan.

Naghiusa ug kusog silang Police Sr. Instr Benjie Ancheta sa Alabel Municipal Police station ug Police Chief Instr. Renato Salarda sa Makar Police station sa pagdakop sa nagpangalan ug Del Acharon 20 anyos nga taga Purok 2 Tocawal, Alabel kagahapon.

Kini human makit-an ang wanted nga misuroy sa Labangal hinungdan nga nagporma gilayon ug team ang duha ka presento.

Gamit ang Warrant of Arrest nga gipagawas sa Regiona Trial Court Branch 38 gidakop si Acharon sa kaso nga pagpanglugos.

Nasuta nga gipagawas ang Warrant of Arrest niadto pang Nobyembre 2016 apan kanunay nga makasibat ang suspek ug nagpadayon sa pagtago.

-- Advertisement --

Gilayon nga gidala sa kapulisan sa Alabel ang dinakpan aron andamon ang commitment order padulong sa Baluntay Provincial Jail sa Sarangani Province.