GENERAL SANTAOS CITY – Padayon pang giimbestigahan ang teoryang ginatan-aw sa kapulisan sa kamatayon sa usa ka gwardya sa compound sa Unicorp Equipment Rental sa Makar Brgy. Labangal ning syudad.

Pagpatay sa security guard sa gibantayan niining establisiemento sa Makar, Brgy. Labangal GenSan

Giila ang biktima nga si San Diego Teng, 42 anyos, security guard sa Amona Security Agency nga residente sa Uhaw Brgy. Fatima.

Matud kang PMaj. Patrich Elma, hepe sa Makar Police Station, nakita ang biktima nga nagbuy-od sa yuta og wala nay kinabuhi nga may ubay-ubay nga samad-dinunggaban.

Nawala ang XRM motor og issued firearm sa biktima. Dihang giproseso sa sakop sa SOCO ang crime scene, narekober nila ang 2 by 2 angle bar nga may lama sa dugo.

Gibutyag ni Elma, nawala ang 4 ka CCTV cameras sa compound apan ginaproseso na ang pag-review sa monitor aron sa pag-ila sa mga suspek.

Sa inisyal nga imbestigasyon, adunay natigayong komosyon tali sa biktima og gibanabanaang duha hangtod tulo ka mga suspek.

Ang biktima nakaangkon ug gisi sa suwang, guba ang nawong tungod sa mga samad, pipila ka parte sa ngipon ang natangtang timailhan nga gikulata gawas pa nga may samad ang likod sa ulo nga timailhan nga gibunalan og magahi nga butang.

Gisaysay sa bayaw nga una ang natigayon ang krimen, nakasulti kaniya ang biktima nga pipila ka higayon nga gisulod og kawatan ang gibantayang establisiemento.