GENERAL SANTOS CITY – Mapasalamaton si Police Regional Office-12 Director Chief Supt. Cedrick Train sa pagkakaplag sa sako nga puno nga may unod nga IED components sa Lumatil, Maasim, Sarangani Province.

Sumala pa nga delikado kon ugaling wala kadto narekober ug nagamit sa pagmugna ug mga eksplosibo aron makamugna na usab ug kahadlok ug kadaot sa rehiyon.

Gituohan matud pang ang naasoy’ng mga gamit ang gipanag-iyahan sa mga nahibiling miyembro sa Ansar Al Khilafa Philippines, base sa ilang mga nakalap nga impormasyon.

Kini hilabi na nga may mga nabilin matud pang sakop ang na-neutralize nilang lider na si Muhammad Jafar Maguid alias Tokboy.

Gawas sa maong grupo, may uban pang matud pa silang gimonitor lakip ang mga Abu Sayyaf, Maute terror group ug uban pa.

-- Advertisement --

Sa karon padayon matud pa ang ilang pagpaningkamot katambayayong nila ang Armed Forces of the Philippines, aron mailhan ug matultulan ang mga walhong grupo ang gapahigayon ug mga pagpamomba ug kasamok sa palibot.

Gipaniguro usab ni Gen. Train nga walay puas ang ilang gipatuman nga hugot nga security measures aron mapanigurong luwas ang katawhan ug ang palibot.

Wala pa matumbok sa mga otoridad kung pila ka ekplosibo ang pwedeng mamugna gikan sa naasoy’ng IED components.

Sa karon blangko pa usab ang mga otoridad sa ilhanan sa suspek nga nagbilin sa nasampit nga sako.