GENERAL SANTOS CITY – Nalipay ang mga tuna producers sa dakbayan gumikan sa napirmahan nga kasabutan tali sa Russia.

Ang General Santos City ang nag-unang producer sa tuna sa tibook nasud kung asa anaa sa 25,000 ang direktang mga trabahante niini.

Usa ka dakong kalambuan sa mga tuna producers nga madugangan ang ilang merkado.

Gibutyag ni Cabinet Secretary Karlo Nograles nga dakong benepisyo ang maangkon sa Mindanao sa natigayong pagbisita ni Pangulong Rodrigo Duterte sa Russia.

Nasayran nga may Memoranda of Understanding (MOU) ang gipirmahan sa pagbisita ni Pangulong Duterte sa Russia tali sa Philippine tuna producers og sa Russian counterparts.

Matud pa niini nga ang maong kasabutan ang dakong kalampusan dili lamang sa mga tuna producers, apan sa tibook Mindanao nga source sa 90 percent sa tuna products sa nasud.

Gibutyag usab ni Nograles nga atol sa natigayon nga 21st National Tuna Congress sa miaging bulan sa Septiembre ang mga sakop sa Soccksargen Federation of Fishing and Allied Industries, Inc. (SFFAII) ang mihangyo nga tabangan nga makapangita og mga export partners ilabi sa Russia.