Gilauman nga sa bulan sa Septyembre adunay muabot nga Pfizer vaccine batok sa COVID 19 sa dakbayan.

Matud pa ni Ben Claudio, Vice President sa Gensan Chamber of Commerce nga kini gumikan nakaarkila na ang syudad og cold storage facility.

Nasayran nga cold storage facility ang kinahanglanon alang sa pfizer vaccine gumikan manginahanglan og negative 80 hangtud sa negative 60 degrees celsius.

Una niini gipaklaro ni Atty. Arnel Zapatos, City administrator nga dili kinahanglan mupalit og cold storage facility ang syudad aron nga didto ibutang ang mga vaccine susama sa pfizer nga nanginahanglan og mas bugnaw nga temperatura.

Gikadugang pa ni Atty. Zapatos nga ang Department of Health ang naghatag og freezer sa dakbayan nga kaya nga mabutangan sa mga bakuna nga dili kaayo nanginahanglan og tumang kabugnaw nga temperatura.

-- Advertisement --

Sa miaging adlaw miabot sa syudad ang 710 vials sa moderna vaccine nga nanginahanglan og negative 20 degrees Celsius nga temperatura.

Sa unang pamahayag ni vaccine czar Carlito Galvez nga sa 4th quarter sa 2021 ang mga pfizer vaccines og moderna ang maoy nahibiling order nga bakuna sa nasud.