GENERAL SANTOS CITY – Padayon pang giimbistigahan sa Polomolok Municipal Police Station ang ilhanan sa patay nga lawas sa usa ka babaye nga nakit-an sa Purok San Miguel, Brgy Klinan Sais, Polomolok, South Cotabato kaniadtong sa miaging adlaw.

Matud ni PLt Col. Alex Joe Orcajada, ang hepe sa maong estasyon sa kapulisan nga nagpabilin pa sa punerarya ang biktima og wala pay pamilya nga miangkon nga ilang kabanay ang nasampit.

Payaton, kulot og taas ug buhok, dark complexion ang pamanit og gibanabanaang nagpangidaron og 30 hangtod 40 anyos ang pangidaron sa nasampit.

Nakit-an sa truck driver kauban ang iyang pahenante nga gilabay sa duha ka indibidwal sakay sa motorsiklo ang biktima.

Gibutyag ni Orcajada, ginahulat pa ang mamahimong resulta sa post mortem examination nga gipahigayon aron masuta kung unsa ang gikamatay sa biktima nga walay sapot dihang nakit-an.

Dako ang pagtuo sa kapulisan nga posibleng gilabay sa lugar ang biktima.

Panawagan sa opisyal sa mga nawad-an ug miyembro sa pamilya nga pwede silang mahidangat sa ilang Barangay o dili ba kaha sa Polomolok Police Station aron nga mahatagan sila ug impormasyon.