GENERAL SANTOS CITY – Ipadayon karong adlawa Martes, May 4 ang pagbakuna sa mga senior citizen sa syudad human nga nadawat sa City Health Office kon CHO ang 3,737 doses sa Sinovac Vaccine.

Matud pa ni National Immunization Program Coordinator, Dr. Ma. April Mae Maquilang, sa CHO nga 1,080 vials ang nadawat alang sa 2nd batch sa mga senior citizen ug 1, 208 alang sa second dose sa mga lolo ug lola nga una nang nakadawat sa maong bakuna. Samtang ang syudad ang nakadawat usab og laing 1,448 vials alang sa nabiling anaa sa category A1 sector.

Sa pamahayag ni Dr. Maquilang nga priority sa vaccine ang mga barangay nga adunay taas nga kaso sa Covid infections, susama sa mga barangay sa Lagao, Bula, Conel, San Isidro, Apopong, Labangal, Calumpang ug Barangay Fatima.

Gibutyag nga ang SM mall na lang ang gamiton isip vaccination site sa mga senior citizens dili susama sa miaging mga semana nga tulo ka malls.

Magpadayon usab ang vaccination rollout sa matag Rural Health Unit.