GENERAL SANTOS CITY – Resulta sa kooperasyon sa mga sibilyan pinaagi sa paghatag og impormasyon ngadto sa kapulisan ang malampusong pag-ibot sa mga punuan sa mariwana sa Arakan, Cotabato niadtong Lunes.

Matud pa ni PBGen. Alfred S. Corpus, human makumpirma ang taho gikan sa mga residente sa Prk. 4 Brgy Sumalili nga may mga pananum sa mariwana sa maong dapit, gilayon kini nga giadtuan sa kapulisan nga gipangunahan ni PCapt. Gaspar Ewangan Maguiwe.

Sa pag-abot sa lugar naabtan ang usa ka lalaki giila nga si Julito Magsalang Ocer alias Longhair, 38, mag-uuma nga namisbis sa mga pananum nga mariwana.

Mariwana plant

Human nga gipasabot sa balaud nga nalapas , gilayong giposasan sa kapulisan ang nasampit samtang gipang-ibot ang mga pananum.

Nahatud na sa Arakan Municipal POlice Station sa Provincial Crime Laboratory sa Kidapawan City ang mga ebidensya alang sa himuong pagsusi samtang giandam ang kasong pagsupak sa RA 9165 nga ipasaka batuk kay Ocer pinaagi sa Inquest Proceedings.