Migratory Raptors in Glan, Sarangani Province – FB image

GENERAL SANTOS CITY – Nitala ug mas labing daghan nga migratory raptors ang nanglupad sa kawanangan sa Glan Sarangani Province karong tuiga itandi sa miaging tuig.

Kini ang gikumpirma ni Dr. Roy Mejorada ang in-house veterinarian sa ECPC kon Environment Conservation and Protection Center.

Sa pagmonitor sa ECPC gikan sa Setyembre 19 hangtud niadtong Sabado, Oktubre 5, niabot na sa 139,993 ka buok nga migratory raptors ang ilang sayantipikong naihap.

Mulungtad ang ilang pagtala hangtud Oktubre 30.

Kahibaluan nga sa miaging 2016, nakatala ang ECPC ug 78,000 ka buok nga mga langyawng banog.

Pagka-2017, miabot sa 130,000 ka mga migratory raptors ang miagi.

Niaging 2018, niabot sa 105,000 ug karong tuiga anaa na sa 139,993 ka buok nga migratory raptors ang nagpakita bisan wala pa nahuman ang monitoring.

Nagsugod ang pormal nga pagtuon sa ECPC Sarangani kabahin sa migratory raptor niadtong tuig 2016 kauban ang Raptorwatch Network Philippines.