Ipasaka niining adlawa sa Prosecutors Office ang reklamo batok sa usa ka lalaki tungod sa pagbaligya ug parrot human nga nasikop sa gipahigayong entrapment operation sa mga otoridad sa Barangay Baluntay Alabel Sarangani Province.

Giila ang suspek nga si John Patrick Toribio, 28 anyos nga residente sa maong lugar.

Matud kang Police Liutenant Marcelino Antonio Nalus sa Maritime Police nga nakabase sa Glan ang kasong paglapas sa Section 27(e) o ‘Trading of Wildlife’ sa Republic Act 9147 ang ipasang-at batok kang Toribio.

Gibutyag sa opisyal nga ginadili sa balaud ang pagbaligya og ‘endangered bird species’.

Sa iyang pamahayag nga padayon ang ilang ginahimong imbestigasyon aron masayran kung asa gikan ang duha ka parrot nga narekober gikan sa posisyon sa suspek.

Gikanayong nagkantidad ang nasampit nga mga langgam og P33,500. Gibutyag ni PLt. Nalus nga namonitor ang usa ka post sa social media may kalabotan sa pagbaligya og duha ka parrot hinungdan nga wala magduha duha pa ang Maritime Police Station Sarangani sa pagpakasa og operasyon kauban ang kapulisan sa Glan, Alabel MENRO og uban pa nga ahensya miaging adlaw Agosto 9 sa main road Barangay Baluntay, Alabel.

Usa ka pulis ang nagtakuban nga poseur-buyer kung asa mupalit kini og duha ka suspected endangered bird species gikan sa suspek nga anaa na karon sa kostudiya sa mga otoridad.