GENERAL SANTOS CITY – Lain na usab nga pagpamusil ang natigayon sa dakbayan sa Luningning Compound, Brgy. San Isidro ning syudad.


Sa impormasyon nga nakalap sa Bombo Radyo, giila ang biktima nga si Michael Pagaduan, 29 anyos, ulitawo ug residente usab sa nahisgutang lugar.


Sa inisyal nga imbestigasyon sa San Isidro Police Station, gipusil ang biktima alas 7:55 kagabie kung asa ang usa ka wala mailhing suspek ang kalit nga misulod sa kuwarto og dayun gitiro ang biktima sa usa ka higayon igo sa iyang dughan nga bahin.


Paspas nga nisibat ang suspek sa wala masayring direksyon paghuman sa pagpamusil.


Samtang ang biktima gilayon usab gidala sa iyang pamilya sa Dr.Jorge Royeca Hospital, apan gIdeklara kining patay sa doctor.

Nakuha sa crime scene ang usa ka empty shell sa bala sa .45 caliber pistol nga maoy gituohuan sa kapulisan nga gigamit sa suspek sa pagpusil.

Gibutyag usab sa kapulisan na ang maong biktima bag-ohay lang nakagawas sa presohan gumikan sa illigal nga druga.


Kahibaluan, ang pagpamusil kang Pagaduan ang ikaunom na nga shooting incident nga natigayon sa dakbayan.