GENERAL SANTOS CITY – Laing miyembro sa grupong New Peoples Army(NPA) ang mitahan sa iyang kaugalingon sa kapulisan sa Alabel, Sarangani Province.

Gibutyag sa Bombo Radyo ni Police Senior Insp. Benjie Ancheta, hepe sa Alabel Municipal Police Station nga boluntaryong misurender kanila si Johny Magdasal Blasé alias Janjan, 24- anyos, ulitawo ug residente sa Purok 8, Kablan Barangay, Domolok, Alabel, Sarangani Province.

Matud ni Ancheta, miangkon kaniya si alyas Janjan nga maoy Vice Team Leader sa Platoon 2, Guerrilla Front 71, Far South Mindanao Region.

Segun ni Ancheta, niadtong Abril 2017 pa misulod sa grupong NPA si Blasé ug Disyembre nakadesisyon sa pagkanaog sa bukid tungod wala tumana sa walhong grupo ang mga gipasalig kaniya nga paghatag ug salapi alang sa iyang pamilya gawas pa sa posibleng nasinatiang grabeng kalisod samtang anaa sa kalihukan.

Sa pamahayag ni Ancheta nga kauban sa mga sakop gilayon nilang giadtuan ang gipuy-an ni Blase sa balay sa iyang paryente sa Barangay Baluan.

-- Advertisement --

Kuyog sa iyang mga ginikanan, gilayong gidala sa presinto sa Alabel ang nasampit.

Nasayran nga bag-uhay lang usab gipresenta sa kapitolyo sa Sarangani Province pinaagi kang Gov. Steve Chiongbian Solon ang 15 ka mga NPA surrenderees.