GENERAL SANTOS CITY – Dili pa makumpirma sa kapulisan kung gilugos ang biktima nga si Barbie Inocenio, 16 anyos human kini nga makaplagan nga patay sa Punong Grande, Banga, South Cotabato milabay nga adlaw nga nasulod sa sako.

Sumala kang P/Col. Lino Capellan sa Police Regional Office 12 nga ilaha pa karong ginahulat ang resulta sa autopsy nga gihimo sa patay’ng lawas sa biktima.

Gibutyag sa opisyal, nahuman na matud pa ang examinasyon sa lawas sa biktima ug dili pa sila makahatag ug unsa mang kumpirmasyon gawas sa murder nga nahitabo.

Dugang ni Capellan nga may persons of interest ang may pinakaduol nga posbleng mihimo sa krimen apan ang karelasyon sa inahan sa biktima ang pinakaduol nga gitudlo nga suspetsado.

Kini luyo nga wala gipadaplin nga may mga kaubanan ang suspek sa pagpatay sa menor de edad.

Gihingusgan ni Capellan nga may intensyon gayud nga patyon ang biktima.

Ang bata gikasugilon nga namabdos sa iyang ama-ama ug nasayod ang inahan niini base sa mga mikatag nga mga impormasyon sa Banga.

Gipalawman pa pagmaayo sa kapulisan ang ilang gipahigayong imbestigasyon aron mahatagan og hustisya ang biktima.