GENERAL SANTOS CITY – Padayon ang imbestigasyon sa mga otoridad sa pagpamusil patay sa kanhi Municipal Kagawad sa Malapatan, Sarangani Province bandang alas nuebe kagabie sa Purok San Jose, Brgy. Baluan ning dakbayan.

Giila ang biktima nga si Montacier Celozar Singcoy, 41 anyos.

Samtang samaron usab ang asawa niini human maigo sa bala sa iyang tiil hinungdan nga gilayong gidala sa ospital.

Matud ni Kapitan Armando Diamante sa Brgy. Baluan, base sa inisyal nga impormasyon nga iyang nakalap nga giatangan matud sa tulo ka suspek ang biktima og dihang makaabot na sila sa nasangpit nga lugar, gilayon silang gipabuthan og pusil gamit ang gituohang caliber 45 pistol.

Nakaangkon ug daghang igo sa bala sa lawas si Singcoy hinungdan aron kini mamatay. Sa karon, mas gipalawman pa ang imbestigasyon nga ginahimo sa kupilsan aron masayran ang motibo og ang ilhanan sa mga suspek sa krimen.