GENERAL SANTOS CITY -Milampas na sa 4,000 ang regionwide Covid-19 cases sa Soccsksargen area, human adunay madugang nga 43 newly-reported patients.

Base sa ulahing COVID tracker data sa DOH-Center for Health Development, gikan sa kinatibuk-ang 4,008 kumpirmadong kaso sa rehiyon, 393 niini ang gikonsiderang aktibo o nagpabilin pa sa mga balay-tambalanan.

Lakip niini ang 87 gikan sa General Santos City; 97 sa North Cotabato; 32 sa Sarangani Province ; 86 sa South Cotabato ug 91 gikan sa Sultan Kudarat.

Nagpabilin usab sa 142 ang natala nga Covid-19 related deaths sa rehiyon ug anaa sa 3,472 ang kinatibuk-ang ihap sa mga naka-rekober na.