Posibleng sa loob ng dalawang linggo ay makapaglabas na raw ng hatol ang Food and Drug Administration (FDA) sa aplikasyon ng ilang kompanya na target makapagsagawa ng Phase 3 clinical trials ng kanilang COVID-19 vaccines dito sa Pilipinas.

Ayon kay FDA director general Eric Domingo, nangunguna pa rin sa aplikasyon ang bakunang gawa ng Chinese biopharmaceutical company na Sinovac.

“Ongoing, sabay na nating ginagawa yung (review) ng ethics committee, plus yung technical and administrative regulatory evaluation ng FDA. Kasi in the end, kailangan magkaroon ng final form yung protocol and then ‘yun din ang kailangan ma-approve ng ethics board,” ani Domingo sa isang media forum nitong Biyernes.

“So far we’re still on schedule. We give it two weeks.”

Kung maaaprubahan ang bakuna ng Sinovac, maaari nang magsimula ang kanilang recruitment at zoning o pagpili ng mga lugar na paggagawan ng clinical trial.

Bukod sa COVID-19 vaccine mula China, lumalakad na rin ang aplikasyon ng bakunang gawa ng kompanyang Janssen mula Netherlands, at Clover Biopharmaceuticals mula Australia.

Ang Sputnik V naman na gawa ng Gamaleya Research Institute mula Russia, natengga sa pagkukumpleto ng ilan pang requirements kahit sila ang unang nagpasa ng aplikasyon sa Sub-Technical Working Group (TWG) on Vaccines ng bansa.

“Hindi pa sila nagre-reply sa request ng Vaccine Experts Panel for information. But I think they were able to give preliminary data kaya lang may hinihingi pang extra data from (their) Phase 2 clinical trial yung VEP and I think they were also choosing for a Contract Research Organization, which I think they have already found one.”

Lumabas na sa ilang artikulo sa ibang bansa na nag-apply ng pre-qualification sa World Health Organization ang Gamaleya.

Kung makakalusot ang kanilang Sputnik V sa mapanuring panel ng mga eksperto ng WHO, mas mabilis daw itong mabibigyan ng Certificate of Product Registration kapag nag-apply ito sa Pilipinas, ayon kay Domingo.

May walong vaccine developers pa raw na nagpahayag na ng interes na magsagawa ng clinical trial ng kanilang COVID-19 vaccine dito sa bansa.

Tiniyak naman ng Department of Health (DOH) na hindi magbubungguan ang independent trials ng mga kompanya kapag nagsimula na rin ang hiwalay pang Solidarity Trial ng WHO sa Pilipinas.

Kailangan pa rin kasing dumaan sa proseso ng aplikasyon ang mga mapipiling bakuna sa ilalim ng naturang inisyatibo.

“However, since these will be seven or eight vaccines at the same time, it will go through the process once lang na nakalista na yung seven or eight arms of the trial.”

“During the planning stages for the vaccine trials, the Sub-TWG on Vaccine Development prepared for all possibilities on unexpected delays,” ani Dr. Beverly Ho, DOH Director IV.