Tinawag na “disaster in the making” ng isang international human rights group ang naka-pending nang lagdaan ng pangulo na Anti-Terrorism Bill.

Sa isang statement sinabi ni Human Rights Watch deputy Asia director Phil Robertson na posibleng maghudyat ng hindi patas na pag-aresto at mahabang pagkakakulong sa mga hindi sang-ayon sa posisyon ng administrasyon.

Pinuna ng grupo ang malawak na depinisyon ng “terorismo” sa panukalang batas, dahil tinatapakan daw nito ang kapangyarihan ng mga korte para mag-utos sa pag-aresto at pagkulong.

“Human Rights Watch believes that anyone taken into custody should appear before a judge within 48 hours,” tugon ng grupo sa probisyong taliwas sa batas ng pag-aresto.

Sa ilalim ng panukalang batas, ituturing na terorismo ang aktibidad ng indibidwal sa loob at labas ng bansa na naglalayong maglagay sa panganib ng kapwa, o pagkasira ng mga pampubliko at pribadong pasilidad.

Pati na ang gawaing makakasira ng mga critical infrastructure at magde-develop ng mga gamit panlaban tulad ng nuclear o chemical weapons.

“By this broad definition, starting a fight in a bar could technically be classified as an act of terrorism,” ani Robertson.

“The new counterterrorism law could have a horrific impact on basic civil liberties, due process, and the rule of law amid the Philippines’ shrinking democratic space,” dagdag pa ng opisyal.

Inirerekomenda rin ng panukalang batas ang pagbuo ng Anti-Terrorism Council.