DAVAO CITY – Mamahimo nang makapahigayon og trekking ug camping activities ang publiko sa Mount Apo human nga gitangtang na ning bag-uhay lang ang tulo ka bulan nga off-season nga gipatuman niadtong Agosto.

Una pa man kini subling giablihan, nagpahigayon niadtong Nobyembre 17 hangtod 19 ug interagency climb assessment and monitoring ang Department of Environment and Natural Resources-Davao Region, Office of the Vice Mayor, ug Konsulada sa China sa Davao.

Nanguna usab sa inspeksyon sila DENR-Davao Executive Director Bagani Fidel Velasco, Davao City Vice Mayor Sebastian Duterte, ug Chinese Consulate-General in Davao Li Lin.

Gidasig sa Bise Mayor ang DENR nga magpatuman og mas hugot nga mga giya ug regulasyon alang sa kinatibuk-ang pagpanalipod sa Mount Apo, nga nakasinati kaniadto og halapad nga forest fire ug polusyon tungod sa mga iresponsableng turista.

Mapasalamaton sab si Lin sa paghatag kaniya og higayon nga makasaka sa pinakataas nga peak sa Pilipinas. Sa pikas bahin, kinahanglan nga muagi sa tukmang proseso ang mga turista bag-o sila tugutan nga makasaka sa Mount Apo.

-- ADVERTISEMENT --