DAVAO CITY – Gilayong magmugna ang Davao City Police Office ug usa ka Task Force nga muimbestiga sa kamatayon sa negosyanteng si Yvonette Plaza Chua.
Gikanayon ni DCPO Spekesperson Police Major Catherine Dela Rey, pangunahan ni DCPO Chief Colonel Alberto Lupaz ang Special Investigation Task Group nga maglusad ug imbestigasyon sa tinuod nga motibo sa maong krimen.
Gikumpirma sab ni Police Regional Office 11 spokesperson Police Major Eudisan Gultiano ang pagmugna ug task force subay sa mando ni PRO 11 Regional Director Brigadier General Benjamin Silo Jr.
Lauman sab nga sa sulod sa duha ka simana, ilang dakpon sa dayon ug papanubagon sa balaod ang mga nagpaluyo sa maong murder case.
Hinuon, gikabutyag nga dili lamang usa o duha ang posibleng persons of interest apan wala pa kini gitugyan sa kapulisan sa kasamtangan.
Gitutukan karon sa pulisya ang inisyal na anggulo nga posibleng personal nga pagdumot ug pagpangawat ang mga hinungdan sa maong panghitabo.
Una pa man ang kamatayon sa bikima, namatikdan ang usa ka social media post ni Chua ang mga hulagway nga daw gikulata una kini.
Sumala sab sa post sa usa sa mga kabanay ni Chua, gitudlo niini nga mastermind ang usa ka opisyal sa AFP nga nadestino sa Davao Region isip mastermind sa maong krimen.
Kahinumduman, gipusil si Chua sa wa mailhing suspetsado mismo sa iyang puloy-anan sa Buttercup Green Meadows, Brgy. Sto. Nino, Tugbok, Davao City kaniadong Disyembre 28, bandang alas-7:45 sa gabii.
Giktakdang magpagawas ug opisyal nga pahayag ang PRO 11 mahitungod sa maong lakang sa murder case ni Chua.
via || Bombo LJF
