DAVAO CITY – Gimando gilayon ni Philippine National Police (PNP) Chief Guillermo Eleazar  ang pagpahigayon ug imbestigasyon sa pagpatay sa journalist sa Davao del Sur kagahapong adlawa.

Sumala pa kang Eleazar nga nakiglambigit na sila sa Presidential Task Force on Media Security alang sa hinanali nga pagresolba sa kaso ug pag-ila sa mipaluyo sa krimen ug pagpatay kang Orlando “Dondon” Dinoy.

Gimandoan sab sa opisyal ang Police Regional Office-Davao director nga tutukan ang kaso aron nga masilutan kung si kinsa ang responsable sa krimen.

Gipasalig ni Eleazar nga protektahan niini ang tanan nga mga miyembro sa media batok sa bisan unsa man nga pagpangatake ug pagpangha-rass hinungdan nga nanawagan ang opisyal sa mga media nga makiglambigit gilayon sa otoridad sa higayon nga makadawat kini ug bahad sa kinabuhi.