DAVAO CITY – Nakasinati og grabeng pagbaha ang Tubalan sa lungsod sa Malita, Davao Occidental human nga mibunok ang kusog nga pag-ulan sa maong dapit pasado alas 5 sa hapon kagahapon.

Daghang mga netizen nga nanimuyo sa maong dapit ang nagpadayag og kabalaka sanglit nasudlan ang ilang mga panimalay og tubig-baha gumikan sa paglapaw sa tubig gikan sa sapa.

Posible nga ang maong pag-ulan, tungod sa nagapatigbabaw nga trough kon tiilan sa Typhoon Nyatoh sa tibuok Mindanao.

Nasinatian usab sa pipila ka bahin sa Davao Region ang pagdaut sa panahon.

Gani, gipangpanubayan sa CDRRMO dinhi sa Dakbayan sa Davao ang mga kasapaan.

-- ADVERTISEMENT --

Nakasinati usab og dakong paglunop sa baha ang pipila ka bahin sa Calinan, ug hapit usab nga niabot sa orange level ang tubig sa Davao River, partikular na sa may Bankerohan.

Ang Typhoon Nyatoh, anaa sa gawas sa Philippine Area of Responsibility, ug wala na usab tsansa nga musulod pa sa utlanan sa PAR, sumala sa PAGASA.