DAVAO CITY – Pipila ka mga residente ang gipahikling sa mga otoridad gumikan sa padayon nga pagkusog sa tubig baha nga nasinatian sa dakbayan sa Dabaw.

Gipanghakot nga ang mga residente sa Purok 9 Barangay 9-A paingon sa gipatuman nga pre-emptive evacuation ngadto sa gym sa Marfori 1 ug 2.

-- Advertisement

Gumikan sa kakusog sa ula nga miresulta sa pagsaka sa tubig, pipila sab ka mga panimalay ang naapektuhan ingon man nga natumpag ang tulay sa Barangay Bantol Marilog District ning syudad.

Nag-iyahay sab og hakot sa ilang mga binuhing hayop ang mga residente.

Sumala ni retired P/Col. Alfredo Baluran ang head sa CDRRMO nga kinahanglan nga muhikling  na ang nanimuyo sa daplin sa sapa diin mipadulong na ang kusog nga bul-og sa tubig baha sa sentro nga bahin sa syudad.

Nagpahimangno sab ang ma otoridad sa katawhan nga mag-igmat sanglit padayon nga nagataas ang Davao River nga anaa na sa critical level.