DAVAO CITY – Padayon karon ang pahimangno sa kapulisan nga likayan ang pagsugal gumikan kay usa kini sa mga hinungdan sa pagtapok-tapok ug dako ang risgo nga matakdan sa covid-19.

Una ng gilusad sa mga personahe sa Anti-Illegal Gambling Task Force sa Toril PNP ang Illegal Gambling Operation sulod sa Shanty/Gambling Den nga nahimutang sa Purok 18, Lao St., Brgy. Toril Pob., Toril, Davao City  nga miresulta sa pagkasikop sa pipila ka mga indibidwal nga nagdula ug tong-its.

-- Advertisement

Naila ang mga nahisgutan nga sila si JOVITO FERNANDEZ PACULABA, 62 anyos, lalaki,  adunay ka-live in partner, negosyante; ALBERTO NADAL MILLAN, 59 anyos, minyo, karpentero ug RODQEY LAHAYLAHAY CANTANCIO, 32 anyos, lalaki, ulitawo, laborer susama nga mga residente sa Purok 18, Lao St., Brgy. Toril Pob., Toril ning dakbayan.

Nadakpan ang mga nahisgutan nga nagdula ug baraha diin nakabutang pa sa lamesa ang ilang patad.

Narekober sa otoridad ang mga ebidensiya nga gilangkuban sa usa ka set sa baraha ug kuwarta nga kantidad sa P 285.00.

Ang mga dinakpan anaa karon sa kustodiya sa kapulisan alang sa tukma nga disposisyon samtang gi-andam na sab ang idusong kalapasan sa PD 1602 batok kanila.