DAVAO CITY – Natala sa Davao City ang pinakaubos niining daily positivity rate sukad sa pagsugod sa COVID-19 pandemic.

Pagbutyag ni COVID-19 Task Force Spokesperson Dr. Michelle Schlosser, anaa na lamang kini sa 0.2 percent subay sa ulahing datos. 

Nagapasabot sumala pa kini nga nagapadayon ang downtrend sa mga matalang kaso sa Dakbayan ug usa sab kini sa mga timailhan nga nakontrolar na ang panagtapdanay sa COVID-19.

Usa sa mga nahimong hinungdan sa pag-ubos sa positivity rate ang pagdaghan sa mga nabakunahan na, diin kapin kon kulang 300,000 na lang ang kinahanglang apason alang sa targeted herd immunity.

Apan, gikabalakhan usab ni Schlosser ang posibleng pagsaka na usab sa mga kaso sa unang quarter sa 2022 tungod sa Holiday season.

-- ADVERTISEMENT --

Busa, subli nilang ginaaghat ang mga Dabawenyo nga likayan ang mga dili mahinungdanong panagtapok sanglit usa kini sa mga high-risk behavior nga hinungdan sa panagtapdanay, ilabi na nga dunay hulga sa Omicron variant.

Ginapahugtan na sab ang border controls sa Dakbayan aron masiguro nga dili makasulod ang mga dili bakunado ug potential spreader sa nasangpit nga kagaw.