DAVAO CITY – Gikabutyag sa usa ka pagtuon sa Interfacing Development Interventions for Sustainability kon IDIS inubanan sa Wonjin Institute for Occupational and Environmental Health gikan sa South Korea nga dunay namatikdang pestisidyo gikan sa usa ka komunidad duol sa pineapple plantation sa may Barangay Tawan-Tawan, Baguio District, ning dakbayan.
Gikanayon ni Dr. Won Kim, director for research sa Wonjin Institute, nga gikan kini sa mga nakolektang urine samples sa mga residente duol sa pinyahan.
Nasayran sa maong pagtuon ang taas nga lebel sa chlorpyrifos pesticide nga ginagamit sa mga mag-uuma sa ilang pananum, ug ila pang ginasuta kon magagikan ba ang kontaminasyon niini sa palibot o sa ilang ginakaon.
Dugang pa ni Lemuel Manalo, program coordinator sa IDIS nga aduna sab namatikdan nga mga kaso sa pagka-irita ug uban pang sakit-sakit sa ilang pamanit sumala sa ilang pakighinabi sa mga mag-uuma.
Naalarma sab ang grupo tungod ang maong plantasyon, duol lamang sa mga tinubdan sa tubig sa Panigan-Tamugan Watershed.
Gumikan niini, gipahingusgan karon sa IDIS ang ilang kampanya batok aerial spraying nga una nang nabuhatan og ordinansa sa Davao City ni kanhi Konsehal Leo Avila kaniadtong tuig 2005.
Sumala pa, ilang gipahingusgan ang limpyo nga hangin alang sa mga mag-uuma sa mga bukidnong bahin sa dakbayan.
Nahimong kabahin ang IDIS sa maong pagtuon sa Wonjin Institute ug naglusad sab og susamang pagtuon ang maong institusyon sa mga nasud Vietnam, Malaysia ug Pilipinas.
via || Bombo LJF
