DAVAO CITY – Nailhan na ang patay’ng lawas nga nakaplagan kagainang 6:30 sa buntag nga naglutaw-lutaw sa Purok 5, Bucana Seawall, Brgy. 76.A, Davao City.
Giila ang biktima nga si CHARLES JOHN LOREGAS, 21 anyos , ulitawo ug residente sa Purok 21, Manggahan, Bucana, Brgy 76-A, Davao City. Subay sa imbestigasyon sa kapulisan, midangop ngadto sa San Pedro Police station ang kabanay sa biktima.
Gisaysay sa kabanay niini nga ang biktima nakasinati og depression gumikan sa kondisyon niini sa kalawasan ug ulahi matud pa kini nakit-ang naglakaw-lakaw usa bandang alas-dose sa kadlawon kagainang buntag, padulong sa seawall.
Samtang sa pakighinabi sa Bombo Radyo Davao ngadto sa station commander sa San Pedro PNP nga si PMaj. Marvin Hugos ,wala’y namatikdang samad sa kalawasan ang biktima apan gikanayon sa opisyal nga kinahanglan gihapon kining ipailawom sa autopsiya aron nga masuta ang hinungdan sa kamatayon niini. Sumala ni Hugos nakaplagan ang patayn’g lawas sa duha ka mananagat ,usa ka kilometros ang gilay-on gikan sa kabaybayon.
Subay sab sa imbestigasyon sa kapulisan, nakaplagan ang patay’ng lawas sa biktima nga nakasul-ob og gray nga brief, gray nga short, ug yellow nga sando. Samtang ang duha ka mananagat giilang sila TERESITO ESCAÑA, 69 anyos ug si SANNY OCLARIT, hamtong ang panuigon og puros nakapuyo sa Purok 8, Brgy.76-A, Davao City.
Ning kasamtangan, padayon gihapon ang imbestigasyon sa kapulisan ug ang patay’ng lawas gi claim na sa kabanay niini ug gihaya sa Anghel Funeral homes.
