DAVAO CITY – Mipatim-aw na ang Department of Public Works and Highways XI alang sa paghatag og konkretong tubag mahitungod sa matud pa palpak nga road concreting project sa Barangay Kasilak, Panabo City, Davao del Norte.
Kahinumduman nga una nang nagpagawas og kadismaya si Mayor Jose Relampagos labot sa nahisgutang palyadong proyekto.
Gipahigayon ang panagpulong sa Barangay Hall sa Brgy. Kasilak diin mitambong ang mga personahe sa DPWH XI nga sila Project Engineer Alexes B. Rivera, Assistant City Engineer Joanne Mazo, ug mga konsehal sa barangay.
Gikanayon ni Relampagos sa DPWH nga nasayang lamang ang kwarta sa gobyerno tungod matud pa sa pagpabaya ug wala pag-check sa napasagdang trabaho sa kontraktor.
Sa pikas bahin, gipasalig sab ni Engr. Rivera nga ilang susihon ang dalan kauban mismo ang kontraktor aron makita kung unsa pa ang mamahimong ayuhon.
Apan wala nauyonan ni Relampagos ang tubag sa maong engineer.
Gihingusgan niini nga dili lamang ayohon apan kinahanglan kini nga i-remove and replace tungod lasaw matud pa ang semento nga gibuhos hinungdan nga kamatikdang aduna nay buak sa maong dalan.
Subay niini, seryosong nagpahimangno ang Mayor sa mga personahe nga nalambigit sa proyekto nga mupsaka gayud kini og kaso sa higayong dili matuman ang mga nasabutan aton sa panagpulong.
Una na sab nga gipangayo ni Relampagos ang kopya sa program of works (POW), pangalan sa contractor, ug uban pang mga dokumento nga kinahanglang ipasa sa City Engineering Office.
via || Bombo AFS
