DAVAO CITY – Gipangandaman na ang ipahigayong 2023 bar examinations sa Davao City karong Setyembre 17, 20, ug 24, uban ang mga lakang sa seguridad aron masiguro ang kaluwasan sa venue.
Sumala ni Public Security and Safety Office head Angel Sumagaysay, nagpahigayon ug ocular inspection sa local testing center nga Ateneo de Davao University-Senior High School, sa McArthur Highway ning dakbayan.
Hugot nga dili tugutan ang mga kalihokan sama sa mga salubong, pagpadala, ug mga panagtapok sulod sa palibot sa ADDU-SHS sa mga petsa sa eksaminasyon.
Ang mga Law enforcement personnel ang mopatuman niini pinaagi sa paghawan sa lugar sulod sa 70 metros gikan sa perimeter sa ADDU-SHS, ug ang mga magmalapason posibleng pagasilutan.
Sumala sab sa tigpamaba sa Davao City Police Office nga si PCapt. Hazel Tuazon, anaa sa 274 ka mga pulis ang ipakatap sa unang duha ka adlaw sa bar exams, nga mosaka ngadto sa 374 sa kataposang adlaw.
Gianunsyo sa Korte Suprema nga 10,867 ka mga law graduates ang mokuha sa 2023 online ug regionalized bar exams.
Naglangkob ang mga eksaminasyon sa unom ka core subjects, nga adunay duha ka subject nga gikuha kada petsa sa eksaminasyon.
via || Bombo LJF
