DAVAO CITY – Sa pag-atubang sa midya ni Vice President ug Education Secretary Sara Duterte kagahapon sa nahitabong launching sa Peace Village Exhibit sa OPAPRU-Eastern Mindanao, nagpahayag ang bise nga adunay legalidad ang pagpangayo sa iyang opisina og confidential funds, ug sumala pa, na-disburse og nagamit kini og tarong ngadto sa mga proyekto sa Department of Education alang sa pakigbatok sa hulga sa pag-recruit ug paggamit sa mga rebeldeng grupo sa mga magtutungha alang sa insurhensiya ug uban pang akto sa extrimism lakip paglambigit sa ilegal nga droga.
Dugang pa sa bise, adunay basehan sa balaod ang pagpangayo sa maong pundo, ug nagdepende ang pagtugot sa Senado ug Kamara alang sa disbursement niini.
Subling gipaklaro sab ni VP Sara nga dili “unconstitutional” ang nakuha niining P125 million nga confidential funds alang sa DEPED niadtong tuig 2022 susama sa unang gihingusgan niiniing pahayag sa nahitabong duha ka budget hearing sa Kamara ug Senado ning nilabayng bulan.
Sumala pa, nipasailawom kini sa legal nga proseso ug nisundod kini sa mga probisyon sa pagkuha niini.
Kahinumduman nga gikwestyon ni ACT Teachers Partylist Rep. France Castro, Makabayan Bloc, ug ni Senator Risa Hontiveros ang pagpangayo sa Office of the Vice President sa confidential funds ning nilabayng tuig kon itandi sa nakalabayng administrasyon nga nahatagan og gagmay o maski walay gihatag nga pondo alang sa pagpahigayon og mga proyekto.
Sa iyang mensahe atol sa nahitabong launching sa Peace Village Exhibit kagahapon, nagpadungog-dungog kini batok kang Castro nga sumala pa walay basehanan ang mga alegasyon batok sa bise.
Hulaton na lang matod pa niya nga magpasaka og reklamo ang han-ay sa Makabayan block usa pa ipanghimakak sa bise ang mga alegasyon.
via || Bombo LJF
