DAVAO CITY – Aprubado na karon sa konseho ning dakbayan sa Davao ang ordinansa nga nagtugot kang Davao City Mayor Inday Sara Duterte-Carpio nga magpahigayon og negosasyon tali sa Astrazeneca Pharmaceuticals (Philippines) Inc. alang sa pag-supply sa anti-coronavirus disease (COVID-19) vaccines.

Gipaluyohan ni Konsehal J. Melchor B. Quitain Jr., ang paghatag og otoridad kang Mayor Inday nga mosulod sa “confidentiality agreement” tali sa British drug maker alang sa posibleng pagkuha sa bakuna.

-- Advertisement

Hinoon gitino ni Quitain nga wala pay bakuna nga paliton sa nahisgutan nga stage.

Mahinungdanon sumala pa ang kasabutan aron nga mahisgutan ang mga gikinahanglan nga mga lakang ingon man masugdan apan dili obligahon ang siyudad nga magpalit og bakuna gikan sa Astrazeneca.

Ang nahisgutan sumala pa nga kasabutan dili mobabag sa lokal nga kagamhanan nga mohimo og transaksiyon sa uban nga vaccine makers.

Mas maayo sab matud pa nga adunay gihimong pakighinabi ang lokal nga kagamhanan ingon man negosasyon tali sa mga kompanya nga migama sa bakuna batok COVID-19.

Una na sab nga gipasalig ni Konsehal Danilo Dayanghirang, chair sa committee on finance, nga adunay igong pundo ang lokal nga kagamhanan aron nga ipalit og bakuna.