DAVAO CITY – Gunit na karon sa Criminal Investigation and Detection Group kon CIDG Davao ang giilang lider sa New People’s Army nga si Eric Jun Casilao nga unang gikataho nga naaresto sa Malaysia niadtong nakalabayng adlaw.
Gikanayon ni Maj. Mark Anthony Tito, ang tigpamaba sa 10th Infantry Division sa Philippine Army, pagaatubangon karon ni Casilao ang patong-patong nga kasong kidnapping and serious illegal detention, three counts of murder, ug four counts of attempted murder nga dunay gipasakang arrest warrant sa Davao de Oro.
Gisiguro sab sa gobyerno nga mahatagan og reward money nga P5.4 million ang tawong naghatag og impormasyon mahitungod sa lugar diin nagtago-tago si Casilao una pa siya maaresto.
Sa pikas bahin, gibutyag sab sa 10ID nga missing in action gihapon ang asawa niining si May Vargas, nga wanted sab sa kasong kidnapping, serious illegal detention ug attempted murder ug gikatahong nilupad sab pa-Malaysia aron makaeskapo palayo sa gobyerno.
Gipaklaro hinuon sa opisyal nga dili pa makonsiderang inmate ang notorious CTG Leader sanglit wala pa kini giatubang sa korte.
via || Bombo LJF
