DAVAO CITY – Gihinumdum kagahapon ang pagsaulog sa World Teacher’s Day.
Sa pagpakihinabi sa Bombo Radyo Davao kang Alliance of Concerned Teachers – Davao Chapter President Rey Pardilla, gipasibaw niya ang tagsa-tagsa ka mga isyu nga ginaatubang karon sa mga magtutudlo.
Una diha ang pagpataas sa sweldo sa mga public school teachers gikan sa Salary Grade 15 nga mukabat sa P23,000 ngadto na sa P35,000 aron mapaigo kini sa ilang mga panginahanglanon.
Nanghinaot sab si Pardillo nga panumbalingan sa gobyerno ilabi na kang Education Secretary ug Vice President Sara Duterte ang mga gikasaad sa Magna Carta for Teachers.
Gikabutyag sab sa opisyal nga kasamtangan nang ginahulat ang ayuda nga monthly allowances nga igahin sa City Government of Davao alang sa mga magtutudlo ilawom sa bag-ong pagdumala ni Davao City Mayor Baste Duterte.
Dungag pa ni Pardillo, nagakuha sab ug loans ang mga magtutudlo aron pandungag sa paggasto sa mga panginhanglanon gumikan dili mapaigo ang mga nadawat nga sweldo.
Taliwala sa isyung pagbalhin sa usa ka maestr gikan sa pribado ngadto sa pampublikong tulunghaan, gipaklaro sab ni Pardillo nga dili rason ang mas dakong sweldo sa mga public school teachers ang pagnihit karon sa ihap sa mga private school teachers.
Kinahanglan sab nga i-subsidize pa sa gobyerno ang mga private schools isip kaabag sab sa maayong kalidad sa edukasyon.
Gibutyag sab sa opisyal ang langay nga pagdawat sa sweldo sa pipila ka mga magtutudlo ug ang panginahanglan sab sa mga nahisgutan sa mga kagamitan alang sa ilang teaching -learning activities.
Naglaum sab ang grupo nga tukion pag-ayo sa DepED ang isyu mahitungod sa mga overpriced apan nasa entry level ug dili high powered na mga laptops.
Sa katapusan, dako ang pag-laum sa mga magtutudlo nga hatagan sila sa gobyerno ug saktong pribilehiyo ug benepisyo isip baylo sa ilang takus ug makanunayong dedikasyon sa mga kabatan-onan.
via || Bombo LJ Florendo
