DAVAO CITY – Gikabutyag sa NBI 11 nga napasakahan na ang tulo ka mga indibidwal nga nalambigit sa operasyon sa usa ka kapihan sa langub sa Purok 11, Sitio Langub, Brgy. Baganihan, Marilog, ning dakbayan.
Gikanayon ni NBI 11 Regional Director Atty. Archie Albao, kasong paglapas sa Republic Act 9072 kon National Caves and Cave Resources Management and Protection Act ang giatubang karon sa mga nagpaluyo sa operasyon sa maong kapihan, lakip na ang tag-iya sa maong patigayon.
Dili pa makahatag og detalye sa mga pangalan sa mga kasuhan, ilabi na ang pangalan sa tag-iya sa maong lawak, sanglit dili pa pormal ang pag-file sa kaso.
Dugang pagbutyag sa opisyal, ang lugar nga gitukuran sa maong staycation spot, kabahin sa ancestral domain sa lugar.
Ginatun-an pa sa NBI 11 ang mga kontrata nga ginasudlan sa mga nalambigit sa pagkaestabilisar sa maong patigayon, apan nakipagkoordinar karon ang DENR-Mines and Geoscience Bureau alang sa nagpadayong imbestigasyon.
via || Bombo LJF
