DAVAO CITY – Padayon karon nga nakatala ang Public Safety and Security Command Center (PSSCC) ug mga malapason sa balaud partikular na ang pagpresenta ug peke nga negative results sa RT-PCR test.

Sumala pa kang PSSCC head Angel Sumagaysay, mikabat na karon sa 96 ang natala sa ilang listahan diin lima ka mga indibidwal usab ang ilang napasakahan ug kaso kagahapong adlawa.

-- Advertisement

Kahinumduman nga kanunay ang pahimangno sa buhatan ngadto sa mga pasahero nga gikan sa laing  lugar sa nasod partikular na kadtong taas ang kaso sa Covid-19 nga dili mohatag  ug peke nga resulta sa RT-PCR test gumikan kay dili sila magpanuko nga pasakahan kini ug reklamo.

Gikanayong mukabat sa P80,000 ang mamahimong mabayaran sa mga makalapas sa nahisgutan nga balaod.

Una ng gibutyag ni Davao City Mayor Inday Sara Duterte-Carpio nga mas mahal ang multa sa mga madakpan niini hinungdan nga siguruhon sumala pa nga lihitimo ang i-presenta nga negative RT-PCR test sa higayon nga moabot sa Davao International Airport.