DAVAO CITY – Gikabutyag sa Land Transportation Franchisisng and Regulatory Board kon LTFRB 11 nga lapas 1,500 ka mga PUV kon public utility vehicle sa Davao Region, nga gilangkuban sa 925 ka jeepney ug 617 ka taxi, ang niundang na sa pagpamasada sukad pa tuig 2017.
Hinungdan sa kakuwangon sa mga sakyanan sa mga kadalanan nga masangko sa pagka-stranded sa ubang pasahero.
Sumala ni LTFRB 11 Director Nonito Llanos III, nga dunay mga jeepneys nga dili na makapasar sa road worthiness ug wala na gitugutan sa pagpamasada.
Duna sab mga drayber ug operator nga nihunong na sa pagpamasada sukad pa sa pandemya ug dala na sab sa pagsaka sa presyo sa mga produktong petrolyo.
Rason nganong gilayong maglusad og Peak Hours Augmentation Bus Service koon PHABS aron dunay masakyan ang katawhan sa Davao City ug aron maalibyohan sab ang kakuwangon sa mga sakyanan ug mga drayber nga nagalatas sa mga kadalanan sa dakbayan.
Gipaambit sab ni Davao City Administrator Atty. Tristan Dwight Domingo nga aprubado na sa National Economic and Development Autority kon NEDA ang Davao Public Transportation Modernization Project nga kanhi giilang High Priority Bus Systems kon HPBS.
Gisaka na sab ngadto sa P80 billion ang pundo sa maong proyekto diin 500 ka mga regular 12 meter bus ug 200 ka 9 meter buses ang ipadagan sa tibuok dakbayan ilawom sa proyekto.
Gilaraw nga sa ikatulong quarter pa sa tuig 2023 magsugod ang implementasyon sa High Priority Bus Systems.
via || Bombo LJF
