DAVAO CITY – Hingpit nang gipanag-iyahan sa gobyerno ang siyam ka mga pribadong luna sa mga barangay sa Caliclic ug Limao sa Island Garden City of Samal, nga gamiton alang sa Samal Island – Davao City Connector project.
Kaniadtong Lunes, nagpakanaog na og Writ of Possession ang Regional Tiral Court Branch 4, Panabo City, Davao del Norte alang sa pagkuha sa mga luna nga unang gipanag-iyahan sa pamilyang Lucas ug Rodriguez nga una nang gipahimangno-an sa DPWH 11 nga maapektuhan sa pagpanukad sa konstruksyon sa tulay.
Nakapaskil na ang maong notice duol sa mga luna nga gikatakdang tukuran sa kapin P23 bilyones nga proyekto sa panggamhanan.
Kahinumdumang Nobyembre sa miaging tuig, nagpasaka og lima ka expropriation cases ang DPWH 11 batok sa mag-pamilyang Lucas-Rodriguez nga tag-iya sa mga beach resorts sa Samal Island, ug sa mga residente sa isla nga wala nag-uyon sa nahimong alignment sa tulay.
Una nang mibarog ang pamilya nga dili nila tugutan ang gikasugyot nga alignment sa tulay gumikan sa magpahinabong epekto sa kinaiyahan ug panginabuhian sa mga kadagatan sa isla.
via || Bombo LJF
