DAVAO CITY – Gimanduan ni Davao City Mayor Inday Sara Duterte-Carpio ang kapulisan nga muhimo og imbestigasyon sa illegal drug activity sa Davao City Jail kung adunay personahe sa Bureau of Jail Management and Penology ang nalambigit niini.
Kini human sa pagkaaresto sa duha ka tawo nga misulay sa pagpalusot og matud pa shabu sa nahisgutang bilangguan.
Nagpaila pa ang mga dinakpan nga mga miyembro sa religious organization ug misulay sa pagpalusot sa gikatahapang shabu nga mubalor ngadto sa 1.8 million pesos nga gibutang sa mga noodles.
Anaa sa pangidaron nga 63-anyos ang dinakpang lalaki samtang 34-anyos ang kauban niining babaye ug susamang mga residente sa Barangay Alambre, Toril ning dakbayan sa Davao. Buot karon mahibaw-an sa mayor kung adunay personahe sa BJMP ang nalambigit sa illegal nga binuhatan.
Dugang gipahayag sa mayor nga mihimo na sa pagbisita sa city jail si DCPO Director Col. Kirby John Kraft ug ang mga imbestigador niini aron masayran ang nahisgutang panghitabo.
