DAVAO CITY – Padayon karon ang panawagan sa ahensya sa Ancillary Service Unit (ASU) ngadto sa publiko ilabi na sa mga residente sa Barangay nga dili magpataka og labay og basura sa mga kanal nga maoy hinungdan sa pagbara niini.

Kahinumduman nga okupado karon ang ahensiya kaabag ang City Engineer’s Office (CEO) ingon man mga personahe sa mga barangay sa syudad alang sa pagpanglimpiyo sa mga kanal sanglit sunod-sunod karon ang nasinatian nga pag-ulan sa siyudad nga maoy hinungdan sa mga pagbaha.

-- Advertisement

Kalakip sab sa girumbo sa ahensiya kadtong mga dapit nga sagad sab nga baha-on sa higayon nga mobundak ang kusog nga ulan.

Gitataw ni ASU head Paul Bermejo, wala nagkulang ang ahensiya sa paghatag og pahimangno sa publiko nga dili magpataka og labay sa ilang basura ilabi na sa mga kanal aron nga malikayan ang pagbara nga maoy sagad hinungdan sa pagsaka sa tubig sa higayon nga adunay pag-ulan.

Mapasalamaton ang ahensiya gumikan kay mihatag og suporta kanila ang lokal nga panggamhanan kini pinaagi sa pagpalit og ekipo nga mamahimo nilang magamit sa higayon nga aduna silay ipahigayon nga mga programa sama na lamang sa clearing operation.

Via // Bombo Emman Dela Peña