DAVAO CITY – Nakahatag na ang Department of Social Welfare and Development kon DSWD 11 og P21.7 million nga tabang pinansyal alang sa mga nabiktima sa nahitabong linog sa Davao de Oro kaniadtong Marso.
Sumala pa kang Vanessa Goc-ong, regional director sa DSWD 11, ang maong pondo gigamit sa emergency cash transfer payouts sa pipila ka mga lungsod sa probinsya gikan Abril 20 hangtud 28, ning tuiga.
Sa maong kantidad, nasa P6.8 million ang nahatag sa mga residente sa New Bataan; P5.4 million sa Nabunturan; P4.6 million sa Compostela; P3.1 million sa Maragusan; P1.1 million sa Monkayo; ug nasa kapin P460,000 ang nahatag sa mga residente sa Mawab.
Ang mga apektadong pamilya nga naguba ang balay nakadawat ug P9,960, samtang kadtong adunay partially damaged nga balay ang nakadawat ug P4,980 matag panimalay.
Nanghinaot ang buhatan nga makatabang sa ilang subling pagbangon ang pay-out nga ilang nadawat, samtang gipaniguro niini nga kanunayng abli kanila ang buhatan aron mutabang sa mga nanginahanglan.
Kahinumudumang naigo ang probinsya sa makadaut nga magnitude 5.9 na linog kaniadtong Marso 10, diin nasa lapas 41,000 ka mga pamilya ug kapin 10,00 ka balay ang naapektuhan.
via || Bombo LJF
