DAVAO CITY – Kantidad sa kapin usa ka milyon ka pesos nga shabu ang nakumpiska sa mga personahe sa Maa City Jail ug Talomo Police sa duruha ka mga indibidwal nga gikanayong nagpa-ila nga sakop sa usa ka relihiyosong grupo.
Sumala sa otoridad gilakip ug sulod sa usa ka sakong noodles ang mga shabu aron nga ipayuhot pasulod sa pasilidad.
Una niini, misulod sa Gate 1 ang duha ka suspetsado sakay sa usa ka Isuzu Fuego pasado alas dos sa hapon dala ang usa ka plastic cellophane nga gibutang sa sako sa bugas.
Gipailalom gilayon kini sa inspeksiyon ni JO1 Honey Queen Villarba Sedon ug JO1 Philip Beer Yohohoy Chagas human nga nakapangalan kini sa piniriso nga si Osting Runulo og dunay nakasulat “WELFARE AND DEVELOPMENT OFFICE C/O SJO1 HERBERT NAIVE, DAVAO CITY JAIL MAIN MALE DORMITORY.”
Nagduda ang otoridad human nga namatikdan kini nga adunay mga scotch tape ang mga noodles hinungdan nga gi-usa-usa nila kini pag-inspeksiyon ug nasayran nga gisagulan kini ug mga pakete sa shabu.
Nakiglambigit gilayon ang BJMP sa Talomo Police aron nga sikupon ang mga suspek nga nailang sila si Doroteo Duterte Guibernas Jr, 63 anyos, minyo walay trabaho og residente sa 21, Mahogany St., Roldan Village, Maa, Davao City samtang ang usa giila nga si Mylene Himangpang Tamondong, 34 anyos, self-employed residente sa Purok 3, Barangay Alambre Toril ning siyudad.
Mikabat sa 24 ka mga pakete sa ginadili nga druga ang nakumpiska diin matag pakete niini mitimbang og singko gramos (5grams) ug street value nga tig-75,000.00. Sa kinatibuk-an, mobalor sumala pa kini og mukabat sa P1.8-milyon.
Una ng nasayran nga dili lamang kini ang unang higayon nga misulod ang mga suspek sa nahisgutan nga pasilidad diin nagpaila ang mga nahisgutan nga miyembro sa relihiyosong grupo.
