DAVAO CITY – Giila karon nga dakong tabang ang Half Way Village o Kalinaw Village nga nahimutang sa Brgy. Mahayag Bunawan District alang sa mga rebelde nga buot ng mobalik sa sabakan sa kagamhanan aron nga magsugod sa ilang bag-ong kinabuhi.

Kahinumduman nga gitukod kini sa lokal nga kagamhanan aron matabangan ang mga kanhi rebelde nga magbag-o ug magbaton og kaugalingon nga panginabuhian.

-- Advertisement

Gikanayong kompleto sa mga gikinahanglan nga pasilidad ang Kalinaw Village diin anaa sa 60 ka mga indibidwal ang mamahimong maakomodar.

Gilangkuban kini sa male ug female dormitory.

Una ng gibutyag ni B/Gen. Nolasco Mempin, commander sa 1003rd Infantry Division (ID) sa Philippine Army, nga makatabang og dako sa mga kanhi rebelde ang pagbutang kanila sa Kalinaw Village inay nga magpabilin sila sa kampo sa militar sanglit dili pa sab mawala sa mga nahisgutan ang ilang trauma nga nahimo silang kaaway sa mga sundalo.

Mas maayo sumala pa nga anaa sila sa lugar nga neutral ug wala silay bati-on nga kahadlok dungan sa pagbag-o sa ilang kinabuhi.

Via // Bombo Emman Dela Peña