DAVAO CITY – Gikanayon ni Pol. Major Jack Leon Tilcag, station commander sa San Pedro PNP nga unta magsilbi nga leksiyon ngadto sa mga ginikanan ang ngilngig nga gidangatan sa usa ka kapin 1 year old nga bata kansa namatay human nga nalatayan ug dump truck duol sa lugar diin gipatuman ang road construction sa coastal road Purok 5 Brgy 76 A Bucana ning syudad .

Sumala sa opisyal nga sa wala pa gipatuman ang proyekto sa lugar, nakiglambigit na matud pa sila sa Barangay Kapitan sa maong dapit nga ginadid-an ang pagsulod sa lugar ilabi na sa mga batan-on  gumikan kay delikado ug kinahanglan nga ipatuman ang social distancing ug likayan ang pagtapok-tapok sanglit nagpabilin pa gihapon ang bahad sa Covid-19.

-- Advertisement

Karong adlawa, pasakahan na matud pa nila ug kasong reckless imprudence resulting to homicide ang Elpidio Romero  Dumapay, 44 anyos, taga Purok 1 Sitio Kalamuhoy, Kapatagan, Digos City  kansa maoy driver sa nakaligis nga dump truck.

Samtang nangayo ug pasaylo si  Elpidio sa ginikanan sa biktima nga si Rapcel Artiaga taga Bunawan ning siyudad gumikan kay wala niya gituyo ang nahisgutan nga insidente ug nakosensiya sab siya sa nahitabo.

Wala matud pa niya nakita ang bata ug dira lamang siya nasayud dihang nakadungog na siya ug singgit sa mga tawo.