DAVAO CITY – Gisalang sa usa ka init nga interogasyon ang Department of Public Works and Highways XI atol sa regular session sa Sanggunang Panglungsod kagahapon nga may kalabutan sa mga wa matapos nga mga proyekto sa ahensya sa managlahing parte sa dakbayan sa Davao.
Gikabutyag ni Engr. Lilibeth Sarmiento, District Engineer sa DPWH 11 nga anaa sa P5.5 billion nga budget ang gitagana karong tuiga alang sa 127 ka mga proyektong pagamugnaon diri sa rehiyon sa Davao. Apan matud pa wala mahawan ang pagkadiskumpyado sa City Council ngadto sa ahensya tungod sa mga pending kon unfinished nga mga proyekto nga ilang gisudgad.
Usa na diha ang Maa Bypass Road nga naghatud ug dagkong epekto sa katawhan gumikan sa paghuot sa dagan sa trapiko. Pagbutyag sa contractor sa proyekto nga Jemar Construction, napasagdan kini gumikan sa daghanang mga proyekto nga ginadawat matag bidding.
Gibuyag sab sa Project Inspector sa Asico Road Construction nga dunay pipila ka mga rason nganong wala pa gihapon natapos ang ginabuhat nga Asico Village sa Matina Pangi ning dakbayan nga gikatakdang mahuman ang Phase 1 karong tuiga.
Anaa ang pagbag-o sa alignment sa tulay, ang inaccessibility sa project area, ang gagmay nga ihap sa mga trabahante nga nagalihok sa pagbuhat og tulay, ug aksidente nga adunay kalabutan sa pagbutang og girder nga miresulta sa kamatayon sa duha ka indibidwal.
Hinuon, kung ugaling dili mahuman sa contractor ang proyekto, mamahimong mu-take over ang DPWH sa mga pending nga proyekto.
via || Bombo AFS, Bombo DDB, & Bombo LJF
