DAVAO CITY – Gipaklaro sa Department of Tourism kon DOT 11 nga tugutan lamang ang operasyon sa mga langub alang sa turismo ilawom sa hurisdiksyon sa DENR 11 ug Regional Trial Court.
Matud pa ni regional director Tanya Rabat-Tan, ang matag LGU nga dunay langub kon cave isip tourist spot sa lugar nga dunay clearance sa RTC ang ginapromotar sa DOT.
Nunot kana sa nahitabong pagkadiskubre sa usa ka kapihan sulod sa langub nga nahimutang sa Sitio Langub, Brgy.Baganihan, Marilog, ning dakbayan, nga sumala pa sa DOT, walay permit gikan sa ilang buhatan.
Dugang pa sa opisyal, adunay ginapromotar nga mga langub ang DOT gikan sa Davao Region sama sa Davao del Norte ug Davao del Sur diin gisiguro sab sa ilang mga LGUs ang pagpreserba sa maanindot nga talan-awon niini pinaagi sa pagpatuman sa mga nagkandaiyang guidelines.
Kahinumdumang gikumpirma sa NBI 11 nga gikasuhan na ang tulo ka mga tagtungod ug tigdumala sa Secret Peak Buda Café human sila naisyuhan ug search warrant alang sa kasong Republic 9072 kon National Caves and Cave Resources Management and Protection Act.
Temporaryong gipasirad-an ang maong patigayon samtang ginatun-an na sa NBI ang kalapasan sa pagtukod sa maong establisyemento sulod sa usa ka ancestral domain sa Marilog area.
via || Bombo LJF
