Mga Higala Komusta Ug Maayong Buntag!

Pormal na nga giabrihan ang ika 62 nga Palarong Pambansa 2019 sa dakong hawan sa bag-uhay lang nga nahuman nga gipasigarbo sa dakbayan nga UP sports complex sa Brgy. Bago Oshiro, Tugbok District ning syudad sa Davao. Gitambungan ni Pangulong Rodrigo Duterte ang pormal nga pag-abri ug dala ang mensahe sa paghatag ug suporta ug pagtagad sa mga atleta ilabi na sa mga pisikal nga mga aktibidad sa mga kabatan-unan sa natad sa paugnat sa kusog kon sports dinhi sa atong nasud.

-- Advertisement

Nahimong engrande ang opening ceremony kagahapong adlawa sanglit human sa 69 ka tuig ang nanglabay nga mga katuigan karon lang subli kitang napahigayunan sa pinakadakong sporting event sa atong nasud. Ug kini dako kaayong garbo sa syudad ug sa mga katawhan kay pagpamatuod lamang kini nga kita gisaligan ug gitugyanan sa mga kadagkuang opisyal sa mga tulunghaan kon Department of Education aron dire subling ipahigayon ang nasudnong dula sa mga atleta.

Ug ning adlawa ang unang arangkada sa mga atleta sa pagtinigiay sa ilang mga gipiling duwa nga maoy nagrepresenta sa ilang mga tagsa-tagsa ka mga rehiyon. Ug dungan sa pag-aginod sa unahan, ato sab nga sayron kung kinsa kining mga rehiyon nga modomena gihapon sa paghakot ug daghang mga medalya ilabi na nga magsilbing basehan kini kung unsa ka maayo ang pagdumala sa ilahang mga kadagkuang opisyal.

Ug usa sa mga giatangan karon, syempre ang atong kaugalingong rehiyon ang gitawag nga Davao Eagles kung makab-ot ba niini ang target  nga inig kahuman sa palaro, makuha nato ang ika-lima nga pwesto. Kay sa uwahing palaro didto sa Vigan anaa man kita sa ika siyam sa mga nakakuha ug mga medalya, nga sa ato pa, dili kayo maayo ang performance nga gipakita sa mga atleta niadtong panahuna.

Karon, duna kaha kita’y lauman  ning kaugalingon natong tugkaran ang gipahigayunan sa nasudnong padula kon  Palarong Pambansa? Maangkon kaha nato ang damgo sa mga opisyal nga kuhaon ang ika-limang pwesto? Kay sumala pa lage, nga dakong bentahe alang sa atong mga atleta kay kaugalingon natong nataran ang atong giduwaan nga mas nailhan sa tawag nga “Homecourt Advantage”…

Karon sa inyong tan-aw mangkon kaha nato ang ika-limang pwesto o ato pang malabwan.? Kay duna baya’y panultihon nga ang kakugi ug agi sa mga atleta atol sa padula nag-agad ra kini sa suporta sa mga tigdumala.