DAVAO CITY – Gibutyag sa Davao De Oro Police Provincial Office nga ilang natumbok ang mga responsable sa pagpatay sa SK Federation President sa Maco, Davao De Oro nga si Jorlan Bon Sacay.
Sumala ni PCol. Benedicto Faco, Provincial Director sa Davao De Oro Police, duha ang giilang suspek nga puros gun for hire ang nipusil patay kang Sacay niadtong Hulyo 18 sa gabii sa ilang panimalay sa Brgy. Binuangan, Maco, Davao de Oro.
Nunot kana sa gipalawman nga imbestigasyon sa kamatayon sa batan-ong lider pinaagi sa gimugnang SITG.
Dugang pagbutyag sa pulisya, migula sa imbestigasyon nga personal nga bangi ug dagkong pagdumot ngadto sa biktima ang nagtukmod sa mga suspek nga patyon si Jorlan gumikan na sab sa iyang trabaho isip SK President sa lugar.
Padayon sab nga gitutukan ang mastermind sa makasubo nga krimen.
Pabilin usab nga gitago ang pangalan sa maong mga suspek tungod sa nagapadayon nga pagpasang-at ug kasong Murder batok kanila ngadto sa piskalya.
Nanawagan karon ang Maco LGU ngadto sa dunay kasayuran sa maong panghitabo nga idangop kini sa mga otoridad alang sa paspas nga pagresolba sa kaso ug pagkasikop sa mga nagpaluyo sa kamatayon ni Sacay.
