DAVAO CITY – Human nga mi-resign sa milabay’ng semana, nibalik na usab si Davao City Mayor ug Vice-presidential aspirant Sara Duterte sa iyang gitukod nga Partido nga Hugpong ng Pagbabago isip miyembro ug chairperson niini kagahapon.

Nanumpa siya og balik isip miyembro atubangan sa president sa ilang Partido nga si Davao Occidental Governor Claude Bautista.

Misaksi usab sa oathtaking sila HNP Secretary General Antonio del Rosario, Davao de Oro Governor Javyee Tyron Uy ug amahan niini nga si Senior Board Member Arturo Uy, ug Davao Oriental Governor Nelson Dayanghirang.

Giklaro sa Mayora nga dunay pagtugot sa iyang partido nga Lakas-CMD, diin siya usab ang chairperson, ang subling paggunit sa chairmanship sa HNP.

Nanawagan siya sa mga miyembro sa regional party nga mas pakusgan pa ang partido alang sa pagpanerbisyo sa katawhang Pilipino.

-- ADVERTISEMENT --

Dugang pa ni HNP Sec. Gen. Del Rosario, dili kini kalapasan sa constitution and by-laws sa ilang partido sanglit regional party kini og dili national ang ilang scope.

Niadtong Nobyembre 11, pormal nga gidawat sa HNP ang resignation ni Inday Sara isip miyembro ug chair niini, ug sa samang adlaw, nanumpa isip miyembro sa Lakas-CMD ang Mayora.

Niadtong Huwebes, pormal nga gidawat usab sa Mayora ang chairmanship sa Lakas-CMD atol sa ilang National Council Meeting, subay mismo sa hangyo sa co-chair niya karon nga si Senador Ramon “Bong” Revilla, Jr.