DAVAO CITY – Nakahiagum ug nagkalaing-laing reaksyon sa social media ang nahimong tubag ni Davao City Mayor Baste Duterte mahitungod sa personal nga reklamo nga gipadayag sa usa ka concerned citizen.
Gumikan kana sa pagputol sa suplay sa tubig nga gikaangal sa mga konsumante sa Davao City Water District.
Nagpagawas sa iyang pagkadismaya ang maong concerned citizen tungod sa pagkawang sa suplay sa tubig sa ilang subdivision.
Pinaagi sa usa ka direct message nga iyang gipadayag sa personal account sa mayor, gikanayon niyang nga kinahanglang aksyunan dayon sa panggamhanan ang pagkawala sa water supply diri sa dakbayan ug nagtambag sab kini nga summonan ang DCWD.
Apan mipalag ang mayor sa nahimong pamaagi sa pagsugyot sa concerned citizen, daw gikewstyon niya nga wala ba daw sab niya gipadangat ang maong problema sa DCWD ug sa Apo Agua nga contractor sa gipatukod nga water reservoir sa Tamugan river ning dakbayan.
Sa post ni Mayor Baste, gikanayon niya nga wala siya naangay sa nahimong pamaagi sa pagdangop sa maong netizen sa iyang mulo.
Gi-post sab niya ug apil ang screenshot sa maong pakig-istorya, ug ingon man, nagpadayag sab sa iyang baruganan nga dili kini magamit batok kaniya.
Sa pikas bahin, nangayo ug pagsabot ang wala nagpailang empleyado sa Apo Agua Infrastractura Inc.
Matud pa niya, gipaningkamutan gihapon sa maong kumpanya nga matuman ang unang mugna sa operasyon sa maong reservoir sa ulahing bahin sa tuig.
Bisan pa man sa daghang babag sa operasyon niini, dili sila muhunong sa ilang tumong nga maghatag ug 300 million liters sa treated water supply matag adlaw isip tubag sa krisis sa tubig diri sa dakbayan.
Nagpahigayon ang DCWD ug water service interruption sugod kagabii sa mga lugar sa Cabantian, Indangan ug Communal alang sa maintenance sa Cabantian Production Well No. 1 ug wala gikumpirmang oras sa pagbalik sa water supply sa mga nahisgutang dapit.
via || Bombo LJ Florendo
