DAVAO CITY – Gipanaad sa lokal nga kagamhanan sa Davao City nga makig-alayon sa mga hingtungdang ahensya sa gobyerno aron hingpit nga madayon ang pagtukod sa Waste-to-Energy facility sa dakbayan.
Sumala pa ni Assistant City Administrator, Atty. Tristan Dwight Domingo, nakigtambayayong na sila sa Department of Environment and Natural Resources kon DENR alang sa pagkuha ug gikinahanglang rekisitos lakip na ang pagtugot gikan sa National Economic and Development Authority kon NEDA alang sa maong proyekto.
Dugang pa ni Domingo, labing importante ang partnership sa DENR gumikan ipaagi kanila ang pondo nga naggagikan sa nasudnong panggamhanan.
Gipunting sab sa opisyal ang pagkamahinungdanon sa proyekto gumikan sa kalampusan sa mga programa sa solid waste management nga namugna uban sa suporta gikan sa subsidy o pundo sa gobyerno sama sa susamang pasilidad sa Japan ug kasikbit nga mga nasud sa Southeast Asia.
Bisan pa man sa katakus sa dakbayan nga makamugna ug WTE facility, dagkong pundo ang gikinahanglan niini.
Gikanayong, ang magkinahanglan ang syudad og gibanabanang 3.5 billion pesos gikan sa national government aron mahuman o hingpit nga mapundohan ang tibuok pagtukod sa pasilidad.
Kana ang mamahimong idungag sa 2.5 billion pesos nga una nang gidonar sa gobyerno sa Japan alang sa proyekto.
Gipaniguro sa lokal nga kagamhanan nga pinaagi sa nahimong feasibility study, hugot nga mosunod sa safety, health, ug environmental standards, ang maong pasilidad taliwala sa nagapadayon nga disinformation nga gipakaylap sa mga grupo o indibidwal nga supak sa proyekto.
Kahinumdumang gipaklaro sa Japan International Cooperation Agency nga wala nila gipundohan ni gisuportahan ang maong proyekto.
Gipanghimakak sab ni Dominggo nga pinangayo gikan sa gobyerno ang pundo alang sa capital expenditure o gamiton sa pagtukod sa pasilidad sa WTE.
Andam matud pa ang Davao City LGU nga maghatag og katin-awan ug dugang kasayuran mahitungod sa ipatukod nga WTE facility.
via || Bombo KMG & Bombo LJF
